ស្វាយ ជាដំណាំឈើហូបផ្លែដែលកសិករខ្មែរនិយមដាំនៅគ្រប់ទីកន្លែងនៅតាមភូមិ នៅតាមភ្លឺស្រែ និងដាំជាចំការធំៗ ។
កសិករច្រើននិយមដាំស្វាយដោយកូនដែលបំបៅដោយមែក ព្រោះអាចដុះលូតលាស់លឿននិងឆាប់ឲ្យផ្លែ ។ ប៉ុន្តែក៍មានកសិករខ្លះដាំដោយគ្រាប់បានទទួលផលល្អដែរ ។
នៅពេលនេះខ្ញុំសូមលើកយកបទពិសោធន៍ដាំស្វាយដោយគ្រាប់របស់កសិករ ឈៀន ភីរុណ រស់នៅភូមិគទង់នាគ ឃុំស្តៅកោង ស្រុកបាភ្នំ ខេត្តព្រៃវែង មកបង្ហាញជូន ។
ក្នុងការដាំនេះ លោកពូយកចិត្តទុកដាក់នូវចំណុចមួយចំនួនដូចខាងក្រោម :
១. ការជ្រើសរើសគ្រាប់ពូជ និងការរៀបចំពូជដាំ
ការជ្រើសរើសផ្លែស្វាយដែលរលោងថ្លាគ្មានជ័រខ្មៅហ៊ុំព័ទ្ធ
ការជ្រើសរើសគ្រាប់ពីផ្លែដែលទុំដើម (មិនយកផ្លែបន្ទុំ)
ចិតសំបកគ្រាប់ចេញដោយមិនឲ្យដោយសាច់គ្រាប់ទេ
២. ការរៀបចំរណ្តៅដាំ
ចំពោះការរៀបចំរណ្តៅដាំ មានពីរប្រភេទ :
ដាំ នៅភូមិ : ដំបូងយើងត្រូវជីករណ្តៅជារាងបួនជ្រុង ទំហំ ៧ តឹក ទៅ ១ ម៉ែត្រ និងជំរៅ ៥ តឹក ឬ ៨ តឹក ។ បន្ទាប់មក ដាក់ជីធម្មជាតិ ស្លឹកឈើ សំរាមឲ្យពេញ ។ គ្រាប់ទាំងសំបក ទុកឲ្យរលួយ បន្ទាប់មក កើបដីបាតស្រះដាក់ពីលើ ទើបយកគ្រាប់ដែលបកសំបកហើយមកដាំ ។
ដាំ តាមភ្លឺស្រែ : ចំពោះការដាំតាមភ្លឺស្រែ ត្រូវលើកដីជាពំនូកៗ កំពស់ប្រហែលពី ៨ តឹក ដល់ ១ ម៉ែត្រ ៣ តឹក ។ នៅតាមពំនូកនីមួយៗ លុងជារណ្តៅតូចៗ ដែលមានអង្កត់ផ្ចិតពី ៤ ទៅ ៦ តឹក និងជំរៅ ៥ តឹក ហើយយកជីធម្មជាតិ ដែលពុកផុយដាក់ឲ្យពេញ រួចយកគ្រាប់មកដាំ ។
សរុបមក បទពិសោធន៍ដាំស្វាយរបស់លោកពូគឺ :
ចំពោះការដាំនៅតាមភូមិ ត្រូវកាប់រណ្តៅធំៗ ដាក់ជីធម្មជាតិឲ្យបានច្រើន
ចំពោះការដាំនៅតាមភ្លឺស្រែ ត្រូវលើកដីជាពំនូកខ្ពស់ៗ ទើបលុងជារណ្តៅ
មុនដាំត្រូវជ្រើសរើសគ្រាប់ពូជយកផ្លែទុំដើម ហើយជាផ្លែដែលរលោងថ្លា គ្មានជ័រខ្មៅហ៊ុំព័ទ្ធ
គ្រាប់ស្វាយមុនដាំត្រូវចិតសំបកគ្រាប់ចេញ ទុកតែសាច់គ្រាប់សំរាប់ដាំ ។
លោកពូ បានឲ្យដឹងថា ការដាំតាមរបៀបនេះ ធ្វើឲ្យស្វាយដុះលូតលាស់ល្អ អត្រាគង់វង្សខ្ពស់ មានផ្លែច្រើន ហើយឆាប់ផ្លែតែរយៈពេល ៣ ឆ្នាំអាចទទួលបានផល ។ អាស្រ័យហេតុនេះ កសិករទាំងឡាយគួរតែសាកល្បងតាម៕
No comments:
Write comments